「踎低」個「踎」嘅本字原來系「貓」，因為「貓」好鐘意「踎」，後來引申到「彎腰」也叫「貓腰」，北方人用俗字「毛腰」表示「貓腰」，即「彎腰」。

「出貓」即系「作弊」，考試唔識唔使放狗，放隻「貓」就乜問題都解決嗮嘞。有冇人知道「出貓」嘅出處哩？

「行貓步」即系「Catwalk」、「時裝表演」，又叫「走秀」。爾隻貓識英文。系「金絲貓」。

「貓咗」形容「醉咗」。我恁「貓咗」系出自「醉貓」一詞。除咗「踎」之外，又多個用「貓」嘅動詞。

「賴貓」即系講咗嘅嘢唔算數。爾隻貓「精甩尾」，見到「短尾貓」或者「冇尾貓」千萬要小心。

其餘嘅貓有「爛瞓貓」、「齷齪貓」、「病貓」，「為食貓」，「叫春貓」等等等等。

除此之外，貓重有九條命添噃。真系唔得佢死。

你哋又有冇尐同貓有關嘅嘢可以同大家分享下哩？