Tc兄台大鑑，
兄台文筆一向妙筆生花，意見精闢，文彩極盛，令人拜服。
今次係小弟一次唔同意兄台轉貼出來的文章，
所以又大膽回應一下。

我覺得欣宜扮白雪公主呢單嘢同特權關係唔係好大,
藝人之子女靠父母之蔭上位, 中外皆有。
遠有Julian Lennon, 近有陳祖明, 例子多不勝數。有失敗,有成功。
觀眾亦習以為常,不當是甚麼特權。
後面亦有分析原因，容後再談。

問題係欣宜呢舖真係搞錯左, 以為成班狗仔隊日日跟住, 就係紅左,
人紅, 通常做乜都有人睇, 有人讚,可惜,
佢只係免費成一眾八卦雜誌的賣書話題,
無賞地成為娛樂圈『真人show』的主角,
而且主角的角色任人魚肉，要你做忠就忠，
要你做奸就奸，不過都係奸有多ｄ市場價值。
因為大眾心魔都是『憎人富貴厭人窮』，
睇奸人被揭發，被唾棄，才過癮。
問題係，如何塑造一倨奸人出來？

而欣宜亦算是大半個娛樂圈中人。
因為只有娛樂圈中人及其周邊人物, 才會不斷有新聞(即新鮮劇情)送上,
人物性格連貫, 故事大家都熟知三分,
大眾自然比一個三唔識七的人普通人有興趣。

自從超級經典娛樂圈『真人show』:祥哥家庭倫理爭產奪屍奇情大製作落幕之後,
鮮有如此超級cast及驚世故事的娛樂圈『真人show』出現。
大家抓住一個半個可塑性人物, 便要好好把握,
將她/他『捧紅』後再一腳踩之而後快。

小小一個欣宜, 大家睇住佢大, 父母又係兩代皆無人不識的圈中人,
秋肥戀一幕, 由秋官借肥肥上位的劇情(觀眾咁估),
至分手結局, 大家總覺得自己猜對了,
秋官成個小生款, 點會鐘意一肥女人架?
羅文果時都要靠肥肥上位喇,
個個都係利用肥肥上位之馬。

原來肥, 真係冇真愛? 連友情都係假既?

家陣秋肥戀有下集睇, 主角變成欣宜。
劇情由睇到悶的明星緋聞、吸毒、陪老細…
變成一個大食小肥妹的成長故事, 仲加插近年hit爆既減肥show,
題材新穎, 勵志, 角色鮮明。

睇住佢突然減肥成功, 締造『小豬扒變小柏芝』神話,
人氣一時無兩, 當時又冇人話佢靠特權上位。
跟住大家又追看肥妹大左會唔會學壞, 食煙夜浦,
有冇仔吼, 會唔會玩les…
雖不是曲節離奇的劇情, 但勝在夠生活化。

群眾的心魔開始不耐煩：
『好咯喎, 冇理由俾你做勵志好人咁耐喎，
狂sell果d母女情又係舊蹺,
做得多又被人話煽情濫情, 有乜新蹺呀?
呀, 有喇! 懂建華又落左台,
冇人被我地鬧出氣, 啱喇, 不如將欣宜角色變一變,
將佢變成丑角, 好似懂太咁, d人鬧得幾開心。』

好喇, 先搵條伏線先, 有喇,
佢竟然台上嘴阿吳卓羲呀!
哦, 欣宜發姣喇!, 唔知醜呀!

呢件事, 冇人話佢用特權, 講知名度,
欣宜係人都識,
反而個二打六吳卓羲,真係唔被欣宜嘴過,
我真係唔知乜水,而家都係。
講宣傳效益, 欣宜仲蝕左章。

點解一個女仔, 唔可以送一個禮貌式的吻俾佢鐘意既一個男仔,
如果主動嘴人果個係Isabella又會點? 會唔會被人話唔知醜 ?
點解D FANS見到碧咸發哂癲又攬又鍚, 就係熱情？
點解欣宜嘴個靚仔二打六，就被人勁鬧？
點解唔可以覺得欣宜咁做又幾坦率可愛？
原本仲可以讓各位阿媽放心的一幕：『欣宜鐘意仔，唔搞LES』，
家陣竟然變成欣宜『唔知醜』！

好喇，欣宜變丑角，大眾完全受落。
咁就要推場高潮戲出嚟，滿足大眾喇。
乜話？欣宜扮白雪公主？
佢真係當左自己係拍芝麼？　
嘩！好囉，有戲講喇今次，
『欣宜不知醜，扮白雪公主，三百幾個投訴呀．．．』
『白雪公主係所有男仔既夢想女主角，被欣宜破壞左我地夢想，緊係抵鬧喇！』
『欣宜不受歡迎 ，代表了普羅大眾對特權階級的憎厭 ．．．．』
簡直惡評如海嘯，淹沒全城。
連販文者更以社會現象來分析：
『回歸以後 ， 享特權的外來人太多了．．．是社會文明的倒退 。 』
這是一篇駡欣宜肥肥駡得最惡毒的文章，
用的是文革批鬥方式。

駛唔駛用『社會文明倒退』咁既字眼咁誇張？
抑或只是一篇在在惡評海嘯中博取目光的嘩眾取寵文章？
這個世紀太多真正的『社會文明倒退』，
例如沒有獨立思考、人云亦云、是非不分、跟紅頂白。
無証無據，就話人享特權，
仲無限上綱以『社會文明倒退』打擊只是一心想在娛樂圈演戲工作的婦女，
我覺得簡直是『毒哉斯言』。


我不知欣宜扮白雪公主何來睇得出是『享特權』？
有証據是肥肥利用特權硬要欣宜扮白雪公主？
TVB就算就範，肯俾個特權個電視台藝員，
迪士尼咁大個誇國企業，事事唯我獨尊，
連衛生督察入去做野，都要除帽，
唔通開幕盛典咁大事件，
迪士尼都要買肥肥怕，任佢話事？

若有任何何不滿，為何不是駡作出如此安排的TVB及迪士尼?
而去駡一個跟隨安排去扮白雪公主的欣宜？

至於另一些駡欣宜的理由是『破壞大眾的夢想』，
那為何不駡販賣夢想的迪士尼？
迪士尼為左賺錢，不惜刻薄員工，做事又唯我獨尊，不理譽論。
一個販賣夢想既皇國，原來又是一個唯利是圖的工業。
呢個神聖夢想的破滅，比白雪公主的夢想破滅更甚。

查實，任誰去扮白雪公主也死。
白雪公主的角色除左靚之外，仲要有玉潔冰清的清純形象，
在利慾薰心的大染缸的娛樂圈中，誰又資格去扮演？

反而如果欣宜不是因為由勵志瘦身的正面角色，
被大眾潛意識轉形變成恃寵生嬌的刁蠻角色，
由她去扮白雪公主，更有一種夢想成真的意義。
『大肥妹都可以變白雪公主，簡直係現實醜小鴨變天鵝。』
延續『小豬扒變小柏芝的神話。
『大家唔好再嫌自己肥或醜而放棄呀！努力呀！學欣宜呀！』
原本可以係好一個勵志的故事。
不過當觀眾需要一個丑角集體作出氣對象時，勵志人物也難逃一劫。

情況就似William Hung之前以一句：
『I already gave my best, I have no regrets!』感動大眾時，
大家都覺得佢好勇敢，好勵志，即時一炮而紅。
William Hung魅力瘋魔全球。
香港人更曾以他的人氣勝過好多鬼佬明星為榮。

不過，同一人，唔可以長期勵志落去，觀眾會睇厭。
果然，William Hung在觀眾心中好快變返做一個傻仔。

William Hung以唱歌差到冇哂譜，但做到美國人氣歌手──勵志！
鄭欣宜以唔靚出名而做到白雪公主，其實一樣咁勵志。

大眾的集體潛意識總希望有一些勵志奇蹟出現，以打破沉悶的現實。
可惜今舖，欣宜入世未深，還不知先自己被社會的 集體潛意識改變角色，
以為自己可以一路勵志下去，而且一個藝人，甚麼角色都要嘗試，
電視台的綽頭安排更加好難推。況且周邊的人一定話好，有突破咁話。
於是螢幕上是扮白雪公主，
觀眾心中的『真人Show』，卻上演了一個不自量力，不討好的角色。

曾經有一套電腦動畫電影，是大玩童話中的主角，將角色的形象全部反轉。
其中的白雪公主就是一個醜少女，故事有趣而發人深省。
最後醜樣的白雪公主，為了愛情，
放棄了變靚的機會，和醜樣的王子開心在一起。
欣宜，都應該學這個醜樣白雪公主一樣，
做回自己，不要再刻意扮靚，才會有好日子過。

至於，潛伏在大眾心中的心魔，
往後又會狩獵下一個目標來發洩心中悶氣。

----------------