有三種類似嘅生理現象，都系由口、鼻、喉、肺等器官呼氣吸氣作用而產生，又系絕對控制唔到嘅：

打喊露
本字「打欠呿」（早期）
本字「打凵露」註：廣東俗語考-1933
國語「打呵欠」、「打哈欠」
英語「yawning」

攰嘅時候，好自然會「瞌眼瞓」同「打喊露」。瞌眼瞓系指進入好短暫嘅睡眠狀態，國語即系「打瞌睡」，而打喊露系因為身體疲倦缺氧，要靠一個深呼吸動作來補充氧氣，亦即系國語嘅「打呵欠」。有學者認為「打喊露」最早嘅本字系「打欠呿」，「欠」古音陷，「呿」古音慮，故此「欠呿」發音近似「喊露」。後來「廣東俗語考-1933」註本字為「打凵露」。又因為打喊露嗰陣往往會不自覺發出好似喊噉嘅聲音，所以尐人就將錯就錯，寫成「打喊露」嘞。

打乞嗤
本字「打咳嚏」註：廣東俗語考-1933
國語「打噴嚏」
英語「sneezing」

打喊露會傳染嗎？如果打喊露傳染嘅系眼瞓，噉「打乞嗤」傳染嘅就系細菌。民間傳說話打一個乞嗤系有人掛住你，打兩個乞嗤系有人背後咒你，呢種講法固之然冇科學根據，不過如果一次過打乞嗤打三個以上，就真系有可能系感冒菌入侵嘞。「乞嗤」爾個詞系借字嘅寫法，只取其近音而忽略字義， 本字「咳嚏」就有咳嗽同鼻噴氣嘅意思，「乞嗤」讀音同打乞嗤嗰陣發出嘅聲音十分相似，用來形容爾個咁有氣勢嘅動作，「乞嗤」就比「噴嚏」傳神得多嘞。

打思噎
本字「打嘶餩」註：廣東俗語考-1933
國語「打呃」、「打嗝」
英語「hiccupping」

打喊露同打乞嗤都令人舒服,但由橫膈膜抽搐引起嘅「打思噎」就唔多舒服喇。有學者認為喺宋朝以前，「打噦噫」先至系本字，「噦」乃胃氣之逆，「噫」乃飽食之息。元朝才開始稱「打呃」，明末以後才通稱「打呃逆」，後來「廣東俗語考-1933」註本字為「打嘶餩」。後來因為粵語冇入文，爾個「餩」字就被人忘記咗怎寫，之後大多數輸入法亦冇收爾個字。而家我哋寫成「打思噎」或者「打司噎」，可能系因為「噎」系指食物哽塞於咽喉，之後就引申成因為吞咽食物太快或者食得太飽以致打呃嘅意思。不過無論邊種寫法都好，讀落都有一種窒住窒住嘅感覺，同打思噎嘅感覺系咪好鬼相似呢？順帶一提，飲水其實對緩解打思噎冇乜幫助，分分鐘會濁親㖭！