 討論區主頁 網友談天室
如何分辨平仄聲 | 無發表權 |
| | 新的在前 | 前一個主題 | 下一個主題 | 頁尾 |
| 發表者 | 討論內容 |
|---|---|
| tccheung | 發表時間: 2006-06-30 03:25 |
青韻是我家!   註冊日: 2003-12-27 來自: 發表數: 468 |
如何分辨平仄聲 ***呢篇野唔單止係寫俾比阿e.e.，亦都係寫俾任何一位唔識平仄聲，但係對平仄有興趣既樂友。歡迎參予討論。***
e.e., 「仄」字讀音(則)。唔識平(聲)仄(聲)唔緊要，只要有好學既心志，冇野可以難倒你。 平仄呢家野，唔識既會俾佢嚇親，識左之後同樣會俾佢嚇親。點解？因為佢容易到你唔相信，容易到嚇親你。 以前有個足球教練轉行做講波佬，佢講左句我認為比「波係圆既」更加經典既說話：「佢準備射既呢球十二碼，會有兩個可能，一個係入，一個係唔入。」 e.e.你唔好笑住！平仄就係咁簡單既絕對二分法。任何中文字都有兩個可能：唔係平就係仄，唔係仄就係平。 e.e.向來好學，呢樣我真係由衷咁敬佩；咁簡單既野我真係冇理由唔教你。 嗱，e.e.，我準備教你用一個土法煉鋼既方法去分辨平聲仄聲。以你既資質：應該練習3分鐘，就可以完全掌握點樣分辨中文字既平仄聲；如果你練習超過4分鐘重未攪掂，咁羞家既事就唔好講出黎俾人知，而且連帶我都會覺得好冇面。 又如果e.e.不怕艱難、痛下苦功，連續練習一個鐘頭咁大把，不但可以讀通唐詩宋詞、學下吟詩作對；重可以好似我之前一樣，雙手叉腰大大聲走去話人地：喂！唔識平仄點樣去玩對聯呀！ 點解我會咁把炮，話你練習3分鐘就攪掂？都係一句：廣東話係有調性既語言，任何一句廣東話基本上可以話係一句Melody。咁講法一D都冇跨張。 只要你既母語係廣東話，已經有先天性優勢；加上e.e.又識得彈下結他、唱下歌仔，用我教你既方法，去分辨平仄聲真係易過食生菜。 好喇！廢話唔好講咁多，而家開始入正題。 e.e.你只需要响音樂12音階裏面搵出so(低)、ra兩個音，隨便用任何一個中文字用so(低)、ra讀(唱)出黎，如果用so(低)讀得出(要食得啱音為準)，咁呢個字就係(下)平聲字；如果用ra讀得出，咁呢個字就係(上)平聲字。而你暫時唔需要理會佢乜野上平下平左平右平高平低平前平後平，總之讀得出就係一個字：平！ 咁如果用so(低)、ra兩個音都讀唔出既中文字又點？咁即係呢個字係仄聲字。仄聲亦分上、去、入三聲，而你亦唔需要理會咁多，總之讀唔出既就只係一個字：仄！ e.e.一定覺得好得意。我而家就借用我之前寫既下聯第1句既7個字，列舉7條範例俾你睇。 ******************************* 民謠淨土不拘節 平平仄仄仄平仄 (如果用so(低)、ra讀出既音，响中文係冇呢個字，會用(？)號代替。) 民：用so(低)、ra去讀(唱)出黎，會讀成(民)//(蚊)，咁即係話(民)字係下平聲，連帶其它同音字(文)(紋)(聞)等，都係下平聲字；而(蚊)(炆)等就係上平聲字。 謠：用so(低)、ra去讀(唱)出黎，會讀成(謠)//(腰)，咁即係話(謠)字係下平聲，連帶其它同音字(搖)，都係下平聲字；而(腰)(邀)等就係上平聲字。 淨：用so(低)、ra去讀(唱)出黎，會讀成(？)//(晶)，即係(淨)字係讀唔出，所以(淨)係仄聲字。而(晶)(睛)等就係上平聲字。 土：用so(低)、ra去讀(唱)出黎，會讀成(逃)//(滔)，即係(土)字係讀唔出，所以(土)係仄聲字。而(逃)(淘)(陶)等係下平聲；(滔)(韜)等係上平聲字。 不：用so(低)、ra去讀(唱)出黎，會讀成(？)//(巴)，即係(不)係讀唔出，所以(不)係仄聲字。而(巴)(爸)等係上平聲字。 拘：用so(低)、ra去讀(唱)出黎，會讀成(渠)//(拘)，咁即係話(拘)字係上平聲，連帶其它同音字(駒)等，都係上平聲字。 節：用so(低)、ra去讀(唱)出黎，會讀成(？)//(知)，即係(節)係讀唔出，所以(節)係仄聲字。而(知)(之)等係上平聲字。 e.e.係咪覺得好好玩呢？不過玩時玩，你千祈唔好睇小呢種土法煉鋼，佢用黎分辨平仄聲既準確率可達95%。咁點解唔係100%？因為我怕e.e.你間中會讀到走音，所以留番5%誤差率當做保險。如果你要達到百分百準確咁高既要求，咁最好叫粵音大字典去教你。 e.e.可以照辨煮碗，試下將其它字用so(低)、ra兩個音去讀下，睇下點樣？如果你唔明，唔緊要，我一係唔教你，一教就要教到你明白為止。 好啦！今次係咁先，有時間再講下點解吟詩作對一定要識平仄聲既問題。 p.s.至於廣東話分9聲，雖然複雜左D，但係要學都唔係難。 ******************************** e.e.你對既拆字聯，一開始已經唔pass，因為//李木子//係冇意思既句字。//習白羽，支羽振翅//，都算有D意思，但這兩句複了(羽)字，犯了格，因上聯既呢度並冇玩複字。//支羽振翅//算是不錯，但(翅)字是仄聲，不能作為下聯的結尾字。 你試下參考Derek既下聯，不單止有好清𥇦既意思，而且平仄聲跟上聯相對呼應。我轉貼出黎加上平仄俾你參考一下。努力！ 平平平，平平仄，平平仄仄 張長弓，騎奇馬，單戈作戰。 妙少女，艷色豐，手莫亂摸。(摸)字粵音可讀(麼)，是平聲字 仄仄仄，仄仄平，仄仄仄平 |
| shanshan457 | 發表時間: 2006-06-30 09:21 |
開始0係青韻的常客喇。   註冊日: 2005-07-26 來自: 發表數: 201 |
Re: 如何分辨平仄聲 tccheung 兄
小弟想到一個下联, 不知可不可以成立, 不知分數如何? 請指教! 如對不上, 又或可否作上联? 張長弓, 騎奇馬, 單戈作戰 池水也, 地土也, 水土成坔 (坔, 積水之地, 水少土多的沼澤. 在臺灣高雄鳥松鄉有地名 "坔埔") 山山拜託 |
| Lydia | 發表時間: 2006-06-30 15:02 |
網站管理員   註冊日: 2003-12-10 來自: 北角 發表數: 820 |
Re: 如何分辨平仄聲 TC才子,
小妹又黎試下先,不過唔知啱唔啱架  張長弓, 騎奇馬, 單戈作戰 舫方舟,軑大車,加馬趕駕 如有不附,請多加指點!!! 小妹拜上
|
| PPM | 發表時間: 2006-06-30 16:02 |
青韻典堂級民歌好友  註冊日: 2003-12-10 來自: 發表數: 1352 |
Re: 如何分辨平仄聲 hahahha, 又有分身人
 
|
| e.e. | 發表時間: 2006-07-01 02:12 |
青韻是我家!  註冊日: 2003-12-26 來自: 港島 發表數: 656 |
Re: 如何分辨平仄聲 TC 兄台，嘻 ~~ 原來係咁樣的，我又學識多一樣野。
 以前 d 古人七步可成詩，咁佢地咪要好熟練每一個字囉？ #@.@# TC 兄台，我係就係好學，不過學野冇樣叻，年紀大左先學，記性同悟性都唔好哩。  去年習國畫階段，有一天跟老師上深圳書城，佢找來兩本學寫詩詞既書給我，話學國畫學下寫詩喎。買回家越看越胡塗，從此就由它放在書櫃。 有時間會試試再研究一下，到時要勞煩兄台指點指點。
|
| Sim | 發表時間: 2006-07-01 02:46 |
青韻典堂級民歌好友  註冊日: 2004-04-28 來自: 發表數: 1439 |
Re: 如何分辨平仄聲 諗唔到中間三個字, 請高人幫手:
他也人 XXX 人老變佬
|
| shanshan457 | 發表時間: 2006-07-01 10:18 |
開始0係青韻的常客喇。 註冊日: 2005-07-26 來自: 發表數: 201 |
Re: 如何分辨平仄聲 引文:
sim 兄 我自已又諗到一句, 照你話得唔得呢! 朗良月, 晄日光, 日月爭明 |
| shanshan457 | 發表時間: 2006-07-01 10:41 |
開始0係青韻的常客喇。 註冊日: 2005-07-26 來自: 發表數: 201 |
Re: 如何分辨平仄聲 sim 兄, 呢句又點睇? 好女子, 何可人, 女可形妸 |
| tccheung | 發表時間: 2006-07-02 15:45 |
青韻是我家! 註冊日: 2003-12-27 來自: 發表數: 468 |
Re: 如何分辨平仄聲 e.e.
我一睇見你咁既款，唔使問都知道你係唔多明白我教你分辨平仄既方法。不過呢D唔係你既錯，係我既錯。可能係我太過心急，希望可以令你觸類旁通，所以列舉7條範例之中，加左D唔等使既野上去，一大堆字睇到你眼花花。 好！今次我就儘可能精簡D，唔使你睇到真係變左阿花。呢次我就用你既姓名黎做範例，等你可以精神D。 第1個字：用(低)so去唱，會唱成(才)；用(高)ra去唱，會唱成「睬過你」既(睬)。既係兩個音都唱唔正，所以係仄聲。 第2個字：用(低)so去唱，會唱成(馮)；用(高)ra去唱，會唱成(風)。又係兩個音都唱唔正，所以都係仄聲。 第3個字：用(低)so去唱，會唱成(華)；用(高)ra去唱，會唱成(娃)。咦？呢鋪中左！所以係平聲字。 咁即係你個名用平仄聲分出黎係(仄)(仄)(平)。 如果你重未完全明白，唔緊要。平仄聲韻呢家野，講1句好過寫100句；下次見到面我再教你，如果1分鐘之內都講你唔明白，我會自動收皮，返屋企閉門面壁思過。 ************************************ Lydia姐, 輪到你啦！唔好意思，要你等左咁耐。 之不過咁，Lydia姐你千祈唔好再叫我做才子，如果我係就唔怕認，弊在我真係唔係才子。「才子」係Derek條友攞黎砌我既生豬肉。我記得第一次睇到佢整古我，話我係才子，當時我正在嘆緊一壺甘香透綠既碧螺春，都忍唔住即刻爆左句野出黎，攪到電腦個Mon滿佈口水。我肯定果一刻Derek必定會覺得眼眉眺，但係佢發夢都唔會諗到眼眉眺既原因係因為我正在鬧緊佢。 不過呢件係天字第一號既大秘密，你知、我知就算數，你千祈唔好話俾第三者知道，以免影嚮我既形象；更加唔好講俾阿Derek知，因為呢期佢係最當紅，重紅過阿叔林尚義，我唔係幾敢得罪佢。 好啦！你笑完未？笑完就要入返正題。 Lydia姐：你所用既三個字拆出黎：分別係船(舟)、(車)同埋(馬)，呢三樣野同樣係交通工具，比上聯更加有統一性，因為上聯拆出黎係(弓箭)、(戈)，呢兩種係兵器，但(馬)唔係。好可惜你下聯既意思模模糊糊，而且處處犯格，最攞命係用左個(駕)仄聲做結尾字，都係唔合格。 我都知我咁講你會唔多開心，但係同白馬哥相比較，你真係幸福好多。點解？因為白馬哥係最無辜，佢好日都唔出黎玩下，點知一出黎玩就俾我順手攞左黎祭旗，事後我真係覺得好過意唔去，所以又要著草，搬個竇走左黎呢度玩。 其實對聯雖然唔可以進入學術殿堂，但亦係一種民間文化，裏面可以暗藏好多玄機，處處閃耀民間智慧既火花，一D都唔低俗、一D都唔簡單。所以你地咁有興緻玩對聯，我又點會柴你地台？但係就唔會鼓勵你地玩D難對既聯，因為對得唔工整，俾人話唔好，容易洩氣，唔再玩落去，就更加冇癮。而且大家都唔係好知道對聯既規格，更應該由淺入深，慢慢玩落去。人地踢世界波係人地既事，只要你識得對聯既遊戲規則，就會知道對聯重有好多好好玩既gimmicks，落場踢下紅白膠波仔一樣咁高興。 就算唔玩gimmick，光明正大玩下一正一反都可以玩餐槽。人地話山高，你可以話水深；人地話旭日東升，你可以話夕陽西沉，冇人吹得你脹。 即係好似白馬哥咁：人地Mel Sir苦口婆心叫你地//適應止//(負)，佢條友就包拗頸，偏偏走去叫人//樂無窮//(正)。Mel Sir一樣吹佢唔脹。呢D同樣係君子以文會友，大家開心過癮。 見你地成日纏住對拆字聯唔放，我就即管講多兩句。其實以前我同班朋友吹水都提過呢對聯，重寫俾我睇；我一眼就𥄫到個(張)字同埋個(單)字，知道同時係玩緊姓氏既gimmick，重有一樣野：個(單)字係已經分拆左出黎既字，唔係未拆之前既母體字「戰」。朋友叫我對下聯玩下，我自己知自己事，所以耍手擰頭。你地可能話會唔會係我多心，人地根本冇玩姓氏gimmick既意思。如果你地咁諗就真係自欺欺人，出上聯呢條友肯定唔會係個初哥仔，又點會話唔識玩呢樣野？我懷疑佢中間都想搵個動詞/姓氏既字黎拆，不過有時出上聯雖然揸住先手，想玩乜野gimmick可以話晒事，但有D野玩唔起就玩唔起，同先手抑或後手無關。 而隔左咁耐，可能早已經有人完整無瑕咁對出左下聯而我唔知道。因為我對唔到，係我能力所限，唔係表示其他人對唔到，隨時會有D老叔父會攪得掂。 而且你唔需要俾佢牽住個鼻走，可以搵三個詞性相同、但唔一定要跟佢係動詞，可以係形容詞、名詞等等成為一個「組合」去對；另外佢其中(張)(單)兩個字相關隱晦意思係姓氏，亦可以唔同佢玩姓氏，你可以將1,3兩個字相關隱晦意思同時係五行、或者同時係方位甚至其它野，咁就可以攪掂佢。如果你地真係要向高難度挑戰，不妨諗諗佢。不過唔知你地明唔明白。 其實呢對聯話佢絕，重未算絕；有D上聯真係絕到無輪、絕到出重金打賞都冇人有本事去賺。而且我用平常心去睇：呢對拆字上聯既難度確係相當高，但就唔算係上乘之作。雖然佢係有好完整既意思，但係意思好平板，好似滾水白烚，完全冇情景。其實以開上聯者既功力，應該可以拆多一個字，描寫一下戰鬥既情景，應該完美好多。唔使好似而家咁樣，擺個3 3 4既陣式，唔通呢條友係好鍾意踢波？ 如果話按照對聯既遊戲規則，呢對上聯有冇瑕疵？我可以大聲話：有！ 你地可能又話：車！你對唔到下聯重有乜資格批評人？又唔可以咁講法，講波佬個個都講到口沫橫飛，但係有幾多個可以落場踢波？ 不過要講都留番得閒先至講，係咁先。 |
| tccheung | 發表時間: 2006-07-02 17:17 |
青韻是我家! 註冊日: 2003-12-27 來自: 發表數: 468 |
Re: 如何分辨平仄聲 攪錯左，我冇野要再補充。 |
| (1) 2 3 4 ... 6 » | |
| | 新的在前 | 前一個主題 | 下一個主題 | |
| 無發表權 | |