頭先番睇呢套舊戲(VCD),有d電影同歌曲一樣,
越睇/聽越有味道。
呢套戲其實有上、下篇, 上篇係Before Sunrise (情留半天),
下篇係Before Sunset (日落巴黎),兩齣電影相隔好多年推出。

我比較鍾意下篇Before Sunset。

Before Sunrise 講一對年青男女,喺流浪歐洲途中,邂逅於火車上,喺維也納二人共渡輕狂歲月中的一天,當然有一夜情,
然後,二人繼續各自嘅旅程,喺維也納火車站月台上,相約半年後,再在這裹見面,無電話號碼,無聯絡地址,就係咁蕭蕭灑灑!
(咁半年後,你估佢地有無係維也納火車站月台出現呢?)

Before Sunset, 講呢對男女重遇,不過係喺9年後嘅巴黎,
男仔將當年輕狂歲月寫成書,喺巴黎(女仔嘅家鄉)新書發佈會上,重遇女仔,今次重遇並非偶然。今次,佢地只有兩小時,發佈會後,至男仔上飛機前兩小時。呢個重遇,比起9年前嗰次嘅dramatic romance, 更為平實、感人、細膩,更romantic。
成套戲都係一邊行一邊講,行足個半鐘,幾乎係real time movie,
觀眾就好似同佢地一齊漫步巴黎,一路聽佢地講佢地嘅故事,聽聽吓,又好似講繁自已嘅故事咁,不論觀眾係咩背景,總有d位能勾起你嘅共鳴!

(p.s. 成套戲就係喺巴黎Rive gauche拉丁區,即係第5區大街小巷行嚟行去,呢一區真係好鬼巴黎,太法國了!
我喺呢區住過半年,呢d環境、氣氛同空氣,再唔浪漫嘅人,再脚踏實地嘅人,嚟到呢度都會腳步浮浮,如果本身都有浪蕩基因,就會好似成日踩住舊雲咁,真係雲上的日子呀! 夜媽媽,喺度講套陳年舊片,自己都覺得有d無厘頭。)

----------------